Jean Assenmacher (Jodokus) - Et janze Levve eß Frößel

1. Et Levve eß jar net su schön, wie se sare,

De Mensch hät ene janz schwere Püngel ze drare

2. Do wiste jebore un küß ob de Welt,
keen Aas fröch, op dir dat Spell och gefällt.

3. Nur die Äldere juuze: „Et wooch sebbe Pond,
e Jesech wie de Papa – äwer sons känjesond.

4. De Hängche su kleen on dat Schnüßche su söß,
Et Föttche su jlatt – keen Schweeß an de Föß.

5. Me könnt su drennbieße, - e wunderschön Kind,
dat meenen die iehrlich – ävver Eldere sen blend.

6. Ich frore mich emmer, wat wollen die bloß,
et wor doch jemütlich en Abrahams Schoß.

7. Doch beste jot dren, en de irdische Bahn,
fäng dat janze Jedöns met dem Levve iersch an.

8. Bei de Tant on dem Ohm sollste emme schön lache,
moß fönefmol am Dach ding Bäuerche maache.

9. Wiß von jedem betäschelt, jebütz un besehn,
häß dauernd de Pämpers zweschen de Been.

10. Moß monatelang op de Bälche käue,
bes emme an dinge Vedauung am deue.

11. Metunge dann lichste beschissen em Bett,
ene Säuchling ze senn – nä dat lohnt sich net.

12. Määste schließlich de Botz net mie jeden Dach voll,
kreste en Botteramm met on moß en de Scholl.

13. Ding Frollein, die sät dann, wer Här em Huus es,
on janz nävvenbei och - wie doof dat de noch beß.

14. Küste meddaas och no Huus on denks, du häß Ruh,
dann sense och he widde schlauer als du.

15. De Papa schreit wödich: „Nä wat en doof Noß“,
dobei hät der als Schollpanz övverhaup nix jewoß.

16. Met der Aale eß einfach nix anzefange,
beklopp, wat die all von uns Pänz don velange.

17. Du verplemmpers ding Schollzeck plus Kindejaade,
öm dann vierzich Johr op de Rente ze waade.

18. Häste endlich ding Lehrer jröndlich veschlesse,
welste alles övver Fraulöck on Zubehör wesse.

19. No dem Motto: Probiere jet övve Studiere,
fängste als Flabes jetz neu an ze liehre.

20. On wenn de dobei noch bejeffsstutzich beß,
stehste widde mol etliche Johre em Streß.

21. Bes dreßich mät me wahrscheinlich vell met.
Schollzeck on Brautfrößel lohnen sich net.

22. Häste aanfänglich e jotmödich Mensch an de Häng,
hät et späde jo doch wedde Hoor op de Zäng.

23. Beim Pastur schwört et, nie usenander ze jonn,
doch met Fuffzech häste et dubbelt do stonn.

24. Ob schäbich, ob schön, ob deck oder schmal,
en de Ehe eß dat em Jrond janz ejal.

25. Denn am Dach jeste arbede, dann bliev se alleen,
on nachs eß et Leech us, dann kannste suwiesu nix sehn.

26. Die blond Hoor hät se von de Motter jeerv,
späde eß et plötzlich fussich jefärf.

27. Als Frau dreet se ihr Hoor met Strähne en Wieß,
manchmol och schwatz – doch dann wit se jrieß.

28. Nur beim Mann kütt der Wäerßel irsch spät,
doch dann eß et keen Farf mie, dann eß et en Pläät.

29. Jetz kreste am Samstach deng Sonndachsjeld,
von de Huusfrau met Jrosche on Euros avjezällt.

30. Deng Schwiermotter eß och net vell besser.
Die kreuzt als Kriegsschiff em Ehegewässer.

31. On dich pack de Wut, wenn se wedde ens meent:
„Sue ne Dötsch hät meng Doochte bei Jott net vedeent“.

32. Fuffzich Johr beste – velech noch jet mie,
Erfahrung häste – ävve schlau wiste nie.

33. Dann beste op emeol en Rente jejange,
deng Frau hät dich laufend em Opnemme hange.

34. On de Enkelche saren: Du leeve Jott
De Opa hät och at en Pann kapott.

35. Der eß noch von Jestern, der kütt net mie met,
Jroßvatte werde – dat lohnt sich net.

36. Metunge verspürste de Jech en de Ziehe,
un naachs häste en Jroßmotte nevve de lijje.

37. No de Taresschau fängste ze schnarche an,
nur am Kinderprojramm, do hängste noch dran.

38. Du määs et de Frau on de Päns net mie rääch,
Schlääch hüere kannste jot, jot sehn kannste schlääch.

39. Kein Jlied witt vom Alter veschont offenbar,
et Fröhjohr wiste nur em Kalender jewahr.

40. Jetz vezällste von Fröher, dat de Baleke sich beeje,
on beim Fröhstöck lieste de Duudesanzeeje.

41. Stehs onnötz als Opa em Huushaltsjelände,
kreß Weihnachte kaum noch de Boom en de Stände.

42. Mensch, wat mähs de em Levve net alles met,
selevs die paar Bierche jönnen se de net.

43. Du liersch, wenn de merks, dat de Luff eruß es,
date nur noch en Botz met jet Inhalt drin beß.

44. De Freund Hein röff am Finster „ Komm, mach dich perat!“
Dann denkste womöglich: mein Jott es dat schad.

45. He jett et doch noch suvell Schönes ze sehn,
wer redd noch von Frößel, - Et Levve es Schön!

Zu den Gedichten im Virtuelles Brückenhofmuseum Königswinter - siehe Link unten.